Mat 28 | GAM | STEP | Ege Sabat yei pora djika, Sande kam kindja tagno dje yeika, dumo Makdala ana Maria ne, ana Maria ta boll aike Jisas gull to pagi al kanboll dje pupill.

Matthew 28

Jisas golo agle er wo gun pi

(Mak 16.1-10 ne, Luk 24.1-10 ne, Jon 20.1-18)

1 Ege Sabat yei pora djika, Sande kam kindja tagno dje yeika, dumo Makdala ana Maria ne, ana Maria ta boll aike Jisas gull to pagi al kanboll dje pupill.

2 Ola dje kam imem kerman woika, God Iwa Kerman tau agelo ta dje worika kupill al kere er kal wo, ku i beragara woro pagle, wo ku al ami dje moi. 3 Yene moi ge kam kunakna yendo mal embe yeika, une konkunom yei al ge kuruwo boll kaima ye pai. 4 Ami una goll pene al kantau moi kambono ge, kand kerman kaima golo, kakene aglene purpur djika, una goi una mal embe moi.

5 Ana soka mopill al tau agelo embe dji, ye kand nagose! dji. Na kando, Jisas nil to pagi iwa ge ye kanboll dje wopill paro ba, 6 asa une dji mal pille, une agle er wo gun pi! Ipon une ba namoro! Une goi pagi al ge ye wo kanbell. 7 Ye ola dje po yene kogoye una mor al kandja embe dje aumbell. Jisas agle er wo dumo Galili pi moro. Ye po kanme! djimbell. Na ye dje awill pora dji we dji.

8 Djika ana soka kand gopill ba, wo pille, Jisas kogoye una moi al dje auboll dje, ola dje kere muk dje er pupill. 9 Kondwe tambiye pupillka Jisas wo embe dji, ye wonmell mo? dji. Soka po une kake al amblo, taimagaus pa molo Jisas kandjiye amblo pla worpill. 10 Worpillka Jisas embe dji, ye kand nagose! dji. Ye po na kogena una mor al embe djimbell, ye dumo Galili po molo, na kane ine! we dje ause! dji.

Ami una kandja dji mal

11 Ana soka er kondwe tambiye pupillka, ami una Jisas golo pai kantau ye moi una er Jerusalem pi. Po opa gale awi una kerman moi al wal porapora yei kani mal kandjambe toi. 12 Opa gale awi una kerman ne, Juda una kerman boll makai to molo kandja beglo kere, ami una ku kerman awo 13 embe dji, ye embe djine, no ou pa mopinka yene kogoye una imina po Jisas golo pai ge kunumb ipi we djime! dji. 14 Una ta djineke gapman iwa kerman Pailat ta pi dal, no kandja kosilleba djimbonka una ye boll natane we dji. 15 Djimaka ami una ku ge i, iwa kerman kambono kandja dji mal po embe yei. Kandja embe dji ge Juda una kandjambe to pa pi, ipon dje pa mor.

Jisas kogoye una kogo yene mal kandja dji

(Mak 16.14-18 ne, Luk 24.36-49 ne, Jon 20.19-23)

16 Kogoye una 11-pela er distrik Galili po, Jisas makimb mekbe ta dji al ge po molo Jisas kani. 17 Kambono kane, yenekne gopyene boglo Jisas awo, pille pla ye moi ba, pende nomane soka pai moi. 18 Jisas manda wo embe dji, God na namba kerman awo, yembe dongall awi; kupill makimb al wal porapora na kantau yendo. Ge pille, 19 ye una kuruwo kama porapora mor al po kandja dje auneke, una na kogena una moye. Ye po nu pagle awi dal, Ne kandjiye al awo, Warye kandjiye al awo, God Murble kandjiye al awo embe yeme! 20 Na kandja porapora dje ye awill pi mal ge, ye po una dje auneke, kambono pille kane kune ye moye. Ye pillme! Na ye boll ege ege molo pa punaka kupill makimb pora djinda we dji.